Rakhine hriamtlai phu AA le Cozah ralkap kahohnak ruang ah ralzaam dirhmun in a dir i ei awk din awk ngei lo le inn le lo chuah tak mi Paletwa kan unau hna Hakha in bawmhnak pek khawhnak ca ah sangkip mino i fonh in Hakha Youts For Paletwa IDPs an dir tiah kan theih.
Hi kong he pehtlai in HYOP-IDPs tawlrel tu ah aa tel mi Salai Tluangte nih, “Mizapi nih kan theih cio bang in ral ruang ah inn le lo chuahtak in ei awk din awk a ngei lomi Chin mi an tam. 2020 March 27 suimilaam 7:30 pm tiang kan theih ning ah Sami lawng ahhin ralzaam dirhmun ah a dir i harnak a tong mi minung 2,764 an si cang. Hi minung 2,764 chung ah kum 15 tang ngakchia minung 700 leng le nau pawi minung 24 an si. Vawleicung ram kip ah a phan cuahmah mi COVID-19 zong Myanmar ram chung ah an kan phak cang tik ah an ca ah lungrethei ngai a si. Ngakchia siseh, upa si hna seh an taksa ngandamnak lei hi mizapi nih an lungre theih pi cem mi si. Cun, Sami ralzaam sin ah Chin Ramkulh chung in peng in siseh, a khua in siseh a tam deuh nih cun bawmhnak hi an pek pah dih cang ti ning law ka palh theng lai lo. Kanmah Hakha tu hi a pe rih lomi kan si rua. Anmah lei zong nih Hakha lei bawmhnak pek ding hi an i ruahchan taktak mi a si ve ca ah Hakha mino nih nu le pa sin ah bawmh hal piak ve ko hna usih tiin sangkip mino upa he i chawnhbiaknak kan ngeih dih hnu ah kan dir mi a si. Chin ah pumkhat kan sinak hi atu ah pekchanhnak in rak langhter cio hram hna usih. Na si khawhtawk in na kut rak samh piak ve hna,” tiah The Hakha Post ah a chim.
2019 kum lio zong ah Paletwa peng Miza IDPs ca ah Hakha bu kip mino le sang kip mino fonh in ni li chung Hakha khuachung ah vak in nu le pa sin ah bawmh an rak hal i tangka sing 206 a chuak. Tangka chuak mi hi Committee chung in minung 3 nih Falam, Mindat le Kalay i fonh in anmah ralzaam umnak IDPs ah an va pek cang hna tiah kan theih.
Cun, “Hakha mino hi bu khat ah van i funtom a har ngai rih nain Paletwa kan unau hna ca ah tiin hmun khat te lungtho tein riantuan kan i tim. Nu le pa nih Paletwa hartong hna ca ah zumh ngamh tein nan thazaang nan rak kan chuahpi cionak lai toidornak he kan in nawl hna. Mah le sang cio ah sang mino hna nih Hakha Youths For Paletwa IDPs timi Voucher te he tlawm an rak in hal hna te hna lai. COVID-19 zawtnak kan ram ah a rak phak ve cang tik ah minung a bu si loin minung pakhat hnih tete in kan i zul lai i kan ra te lai ca ah nan rak kan theihthiamnak lai kan in nawl fawn hna. Chaklei laitlang cu COVID-19 ral lawng kan si rih nain thlanglei laitlang kan unau a tam deuh cu zawtnak ral he, minung ral he an si tik ah Chin ah pumkhat kan si, Chin ah laihritlai unau kan si timi lungput te he nan si khawh tawk nan kut rak samh ve hram uh,” tiah Dr. Cung Pi nih a chim chap.
A liam cia kum 2018 lio zong ah ralzaam in a ummi kan unau hna ca ah tiin Hakha ah mino nih zarh khat chung bawmh an rak hal i tangka sing 76 a chuak. Committee chung tel minung pahnih nih Kachin ram, ralzaam an umnak hmun tiang an va kal i facang tun 100 leng le chiti pun 30, Kalape tun 17, Cite tun 25 le Sahpiat pha 26 an rak pek hna. Atu HYFP-IDPs nih 2020 March 29 in April 5 tiang sangkip ah bawmhnak an hal lai tiah kan theih.
