Union Election Commission nih thimnak tuah kho lo ding a thanh mi Ramthen pakhat le Ramkulh panga chung ah Rakhine ram Ann Peng sining le thanh mi cazin ah aa tel lomi Chin Ramkulh, Paletwa hna cu an sining zoh in cathanh a chuah than lai tiah thawng theih a si.
Union Election Commission riantuan U Myint Naing nih, “Rakhine ram Ann Peng he pehtlai in, a herh mi tete zong timhlamh le thanh a si. Hi pin ah a herh ning in tawlrel than a si lai. Cun, Chin Ramkulh in Paletwa Peng tu hi cu UEC lei nih thanh than ding a si. Zohfel ding zong a um rih. Zohfel dih hnu ah thimnak tuah ding aa tlak le tlak lo thanh than a si te lai,” tiah The Hakha Post ah a chim.
Kachin ram, Karen ram, Mon ram, Rakhine ram le Shan ram chung, mee hmun cheukhat ah zalong tein meepek khawh ding dirhmun a si lo ca ah thimnak tuah lo ding in Union Election Commission nih 2020 October 16 ah a thanh.
Cun, “Humhaknak lei Minister Zung le Ramchung kilvennak lei Minister Zung hna i an lung duh le an timh ning kan hal hna. Anmah lei nih an duh ning le an timhlamh ning an chim dih hnu ah UEC lei nih cathanh a chuah than te lai,” tiah U Myint Naing nih a chimchap.
Atu cathanh an chuah mi kong he pehtlai in Tlangcung party 5 a si mi, Kachin State People Party, Kayah State Democratic Party, Mon National Party, Chin National League for Democratic Party, Karen National Democratic Party le Tlangcung ramkheel party 13 fonh in dirhmi UNA hna nih zohfelnak tuahpiak than ding in cathanh an chuah ve.
2015 kum Myanmar ram thimnak lio zong ah Kachin, Karen, Mon le Bagu Ramthen hna chung in Peng 7 le khuate komh 600 chung lawng si loin Shan ram Peng 7 le mahte khuakhan lairelnak an ngeihnak hmun Wa ah an tuah lo tiah theih a si.
