2020 kum taang 10 camipuai result ning ah Chin Ramkulh, thlanglei Laitlang Paletwa cu a liamcia kum 2019 lio nakin tutan hi a awng mi an tam deuh nain minung pakhat hmanh an awn lonak sianginn pathum a um, tiah kan theih.
2020 kum taang 10 camipuai hi Paletwa Peng in siangakchia minung 2690 nih min cazin an pek i, hi chung ah a dih tiang a phi mi minung 2,244 an si. A phi mi minung 2,244 chung ah a awng mi dihlak minung 224 an si i zatuak in 10.12% a si.
Hi kong he pehtlai in Paletwa Peng Fimcawnnak Zung Lutlai Pu Aung Myin nih, “Paletwa hi mizapi nih kan theih cio bantuk in Chin Ramkulh chung ah kahdohnak a chuah lengmang nak hmun a si. Kahdohnak le harnak phunkip lak ah camipuai an phit tik ah lungrethei ngai in kan um. Asinain atu ah a liamcia kum a awng mi let khat tluk in tutan ah a vun karh tik ah kan i lawm taktak. Cun, tukum hi thiamhlei (D) in a awng mi an thahnem ngaingai,” tiah The Hakha Post ah a chim.
2019 kum lio zong ah Paletwa Peng in taang 10 an awn bak lonak sianginn a tam ngai. Nikum ah khan cun taang 10 a awng mi zatuak in 6.84% lawng a si. Cun, tukum ahcun thiamhlei in awng mi minung 80 leng an si tiah kan theih.
Kum fatin taang 10 sungh-awn a chiat biknak Paletwa Peng, sianginn hon caan ah sianginn aa hong kho lo mi hi siangin 30 leng a si i, nihin tiang ah sianginn 5 lawng an hon rih tiah thawng kan theih
