Chinram, Paletwa peng chung SAC camp pakhat a si mi Point 377 tlangbo cu Arakan Army (AA) nih December 28 ah an chim hna caah SAC ralkap pawl cu an zaam i, December 29 ah Mizoram palek sin ah an i ap tiah theih a si.
Point 377 Camp in a rak zaam mi SAC ralhraang pawl cu December 29 ah Mizoram, Lawngtlai District, Tuisentlang khua ah thip hnih in an lut. Thip khatnak cu zinglei suimilaam 11:00 hrawng ah an lut i thip hnihnak cu zaanlei 6:00 hrawng ah an va lut. Palek sakhan ah an meithal he an va i ap i, Assam Rifles nih an hriamnam he an kalpi hna tiah theih a si.
“A rak zaam mi SAC ralkap pawl chung ah hma a pu mi zong an um. An dihlak in Assam Rifles ralkap nih Lunglei khua lei ah an kuat hna. Moreh lei in Myanmar ram ah kuat than dawh an si,” tiah tualchung mi pakhat nih a chim.
Paletwa peng, India-Myanmar ramri ah a um mi Point 377 SAC ralkap camp cu AA nih December 28, zinglei suimilaam 9:20 ah kan laak tiah, nizan December 29 ah an rak thanh.
