AA nih an kah hna ruang ah Paletwa peng in a zaam mi SAC ralkap pawl nih Matupi peng Lungpang le Cangtak khuate ah lut in khuami thilri an fir hna pin ah thilri tampi an hrawh tiah Matupi Peng Mizapi Ukhruainak Phu nih a thanh.
A luan cia January 20, zinglei sml. 10:00 hrawng ah SAC ralkap pawl cu Lungpang khua ah an lut i vok 10, meheh 3 le ar tampi an thah i an ei. Inn kip thilri an fir leng ah khuami motorcycle 8 le solar tampi an hrawh tiah theih a si.
January 21, zanlei 7:30 hrawng ah Cangtak khua ah an lut than i vok le ar tampi an thah i an ei hna. Cangtak khua Khuate Sii Peknak Inn ah lut in solar pali, battery hna le coolbox pakhat an hrawh. Sii-ai a um mi dihlak mei in an khangh tiah an langhter.
Cun, Cangtak khuate zapi dawr pakhat chung ah a um mi thilri dihlak an fir. Thilri chiahnak inn pakhat, Solar tampi le motorcycle pali mei in an khangh i khuami thilri le hnipuan tampi an fir tiah thawngthanhnak an an tial.
Cu bantuk in SAC ralkap nih an tuah caah, ralzaam hna bawmhchanhnak le zapi ngandamnak ca ah a herh mi sii-ai cawknak ah mahle ti khawh tawk pek chanh cio ding zong Matupi Peng Mizapi Ukhruainak Phu nih forhfialnak a tuah.
Photo: Matupi Peng Zapi Ukhruainak Phu
