Khuasik caan an phak cang ca ah Chin Ramkulh, thlanglei Laitlang Paletwa Peng chung ah aa dor mi ralzaam hna zaan vurh puan le angki lum an ngeih lo ca ah lungrethei in an um i, mizapi sin in bawmhnak hmuh ding an i ruahchan ko tiah theih a si.
Rakzaam hna hi Paletwa khuapi chung lawng ah minung 5000 fai le Sami khuapi chung ah minung 3000 fai an um tiah theih a si.
Zaanvurh puan le angki lum bawmhnak pek an herh mi kong he pehtlai in MP Pu Hoi Tin nih, “Ralzaam camp hi Paletwa le Sami khuapi chung ah a um. Atu hi khuasik nih a kan phak cang tik ah ralzaam hna ca ah zaanvurh puan le angki lum an herh taktak. Ralzaam an si tik ah zeihmanh anmah tein aa tawlrel kho mi an um lo. Kanmah lei zong nih a si khawh chung in mizapi sin ah bawmhnak hal kan i tim. Camp ah a ummi poh hi bawmhnak pek ding a herh mi dirhmun lawngte an si. Kanmah lei zong kan lungre a thei ngaingai ko,” tiah The Hakha Post ah a chim.
Paletwa Peng chung a ummi ralzaam hna ca ah tiin Chin Ramkulh Cozah lei zong nih bawmhnak an hal i, angki lum zuun 1000 leeng an hmuh i, 2020 November 17 ah an kuat hna tiah Minister Pu Soe Htet sin in thawng kan theih.
“2020 November 17 ahkhan Hakha in Sami le Paletwa lei ah angki zuun 1000 leeng kan kuat. Hi kan kuat mi zong hi bawmchan tu hna nih an rak bawmh mi a si. Hi hnu hmailei zong ah bawmhnak hi kuat ding timhlamh rih a si,” tiah Minister Pu Soe Htet nih The Hakha Post ah a chim.
Paletwa Peng chung ah ralzaam camp hmun 4 ah a um. Camp a umnak hna hi Paletwa, Sami, Seingsin le Miza pawl ah an si i, ralzaam hi an dihlak minung thonghra fai an si tiah kan theih.
Photo/ The Hakha Post
Sami ralzaam camp i a ummi an si.
