Ramchung ral a thawhnak Chinram thlanglei Paletwa peng ah taang 10 camipuai cu 2020 March 11 in an thok cang nain siangakchia minung 475 phi loin an um tiah kan theih.
Sianghleirun kai khawh nakding ah a phi mi taang 10 camipuai cu Myanmar ram pumpi huap in tuchun March 11 in an thok cang i cachecknak zung hmun 5 ah an chiah mi Paletwa peng ah camipuai phi ding in minung 2690 nih min an pek nain minung 2215 lawng nih an phit tiah Paletwa Peng Fimcawnnak Zung in kan theih.
Hi kong he pehtlai in Paletwa Peng Fimcawnnak Zung lutlai Pu Salai Aung Min nih, “Atu bantuk in min i pek ko nain phi loin an um hi kanmah leikap kan ruah ning ahcun AA le Cozah Ralkap kahdohnak an tih ca ah a si lai. A tam deuh cu a leng phi ding in min aa pe mi an si. Cun, lamsul lei ah harnak kan tong lai ti an phan ca ah a si lai. Paletwa khuachung B.H.E.S. No. 1, cachecknak zung hmun 2nak ah minung 200 leng phi loin an um,” tiah The Hakha Post ah a chim.
Chin Ramkulh chung ah taang 10 camipuai a phi ding minung 14,177 lak ah minung 12,374 lawng nih an phit i minung 1083 phi loin an um, tiah kan theih.
Photo/ Nang Wai
