Paletwa peng ah khua a sami pafarual pathum Rakhine ramkulh chung ah thah an tonmi kong he pehtlai in thil dik thil hmaan a chuah nakhnga Interim Khumi Affiars Consultative Council (IKACC) nih nihin October 4 ah ca a chuah.
Paletwa peng, Maung-hna-mah khuami U San Aung (kum 61) le a fapa U Aik Myint (26), a tupa Pisi Tun (kum 13) cu Rakhine ramkulh, Kyauktaw peng ah thah an tong.
Hi pafarual hi Mizoram lei ah thilri la in Rakhine lei ah a zuarmi an si i, September 8 ah khan Kyuaktaw lei ah tilawng in a kal.
Ni zeimawzat an thawngpang an theih hna lo hnu September 15 ah pafarual pathum i ruak cu Tanseik khua le Mondaungh khua karlak ah khuami nih an hmuh.
Zei ruang ah dah, ahonih dah hi pafarual pathum hi atu bantuk in an thah hna timi atu tiang theih a si rih lo.
Cucaah thil dik thil hmaan a chuah nakhnga IKACC nih a si khawh chung in kan i zuam lai tiah an ti i, mizapi le tualchung bu kip zong nih thil dik thil hmaan a chuah khawh nakhnga i bawmh cio ding in IKACC nih forhfialnak a tuah.
