Chin Ramkulh Paletwa le Mizoram pehtlaihnak Kaladan hlei dawnh nakding thilri a phur mi tilawng cu AA hriamtlai nih March 16 ah an kah i a kangh dih ca ah IKBZ Bank nih tangka sing 4910, May 18 ah a liam, tiah DVB nih June 19 ah a tial than.
“Hi tilawng hi IKBZ Bank nih tuanvo a laak mi a si. Kaladan hlei dawnh nakding thirthluan pawl le a dang hlei dawnhnak a herh mi thilri cu mei nih a kangh i an rawk. Thilri a rawk mi dihlak (total loss only) ca ah siseh, ral i runvennak (war risk cover) vialte zong tuanvo a laak mi a si ca ah atu bantuk in a liam mi a si,” tiah Chin Ramkulh Cozah Chimphuannak Nawlngeitu Sipin Minister Pu Soe Htet nih The Hakha Post ah a chim.
Hi kong he pehtlai in Pyidaungsu Sakremhnak Minister U Han Zaw nih, “IKBZ Bank nih atu bantuk in an tuanvo an hngalh i an laak mi hi lawmh an um tuk. Cozah budget le kan thilrit an kan chaan tluk a si. Biatak chuah in kan tawlrel than lai i tlamtling tein kan tuan khawh lai ka zumh,” tiah a chim.
Hi hlei dawnh ding hi 2020 February 20 hlan ah lim timh mi a si i, ral kut in siseh, thil dangdang dawnkhaantu a um lo ahcun lim i honnak tuah timh a si, tiah kan theih. ###
