Chin Ramkulh, thlanglei Laitlang Paletwa khuapi chung thonginn ah hren mi Chin nu pakhat cu palek pa pakhat nih 2020 November 28, suimilaam 4:30AM tluk ah a tlaihhrem tiah thawng kan theih.
Tlaihhrem tu pa hi, Paletwa Palek sakhan ah Palek rian a tuan mi a si tiah kan theih.
Hi kong he pehtlai in Paletwa khuami Saya Sawmya nih, “Atu tlaihhrem a tong mi nu hi, Palek sakhan ah thong a tla mi a si. A tlaihhrem hi 2020 November 28 zinglei sang ah si. A tlaihhrem lio zong a hmummi an um. Hi thil a cang mi kong a chungle nih an theih le cangka in tlaihhrem a tong mi nu cu an chawnh i amah zong nih a ka tlaihhrem tiah a chim. Atu hi palek lei nih report tuah le tazacuai ding duh lo phun in an um. Aruang cu, tlaihhremtu pa le Palek sakhan lutlai rian tiang a hnursuan kho mi a si ca ah a si men lai,” tiah The Hakha Post ah a chim.
Atu tlaihhrem a tongmi nu hi a thlauk a hman lomi a si i, 2020 August 7 ahkhan a fa le pahnih a thah hna i thong a tla mi a si. A thluak a hman lo ca ah thongthla colh loin, sii-inn ah an zohkhenh tiah theih a si.
Cun, hi kong he pehtlai in Paletwa Palek sakhan lutlai U Win Lwin Hmu nih, “Kanmah lei nih cun hi kong hi zeihmanh kan thei lo. Atu a tlaihhremtu pa an timi hi, Paletwa Palek sakhan chung ah Quarantine a ummi a si. Cun, zu ding zong a si i, zaan ah a aukhuang lengmang tawn. Sii-inn lei rian ngei hna zong nih amah hi zohkhenh ding in an ti ko nain, keimah nih keimah ka minung ka zohkhenh ko hna lai ka ti hna. Tlaihhrem le tlaihhrem lo hi cu zei thawngpang hmanh kanmah lei nih kan thei lo,” tiah The Hakha Post ah a chim.
Tlaihhrem a tongmi nu hi a thluak a hman lo ca ah Paletwa thonginn ah hren chung a si. Atu hi Palek lei nih taza an cuai lio mi zong a si. Cun, kum zeizatdah thong a tla lai ti biakhiahnak a um rih lo tiah thawng kan theih.
