Chinram, Paletwa khua laak ding in Rakhine hraimtlai AA nih SAC ralkap pawl an doh cuahmah hna i, nihin January 8 tiang ah SAC ralkap sakhaan pakhat (Byuha-Kung) lawng a taang cang, tiah Delta News Agency nih a ṭial.
Rakhine tualchung thawngzamhnak Narinjara zong nih, “Paletwa ah a um mi SAC ralkap sakhaan (Byuha-Kung) laak ding in AA nih faakpi in a doh cuahmah. SAC lei nih an sakhaan a puur lo nakhnga vanlawng le miakpi in faakpi in an lehrul ve hna,” tiah a langhter.
Paletwa khualeng, Kaladan tiva kam i SAC ralkap sakhaan pakhat le khuachung i sakhaan pakhat hi an taang i, cu sakhaan pawl cu laak ding in AA nih an doh cuahmah hi a si, tiah an langhter.
Paletwa khuami pakhat nih, “SAC ralkap Battalion No. 289 an umnak khuachung i sakhaan hi AA nih atu an kah cuahmah lio a si. Hi sakhaan hi an laak ahcun Paletwa cu laak a si cang ko lai. Paletwa ah hin cun mah Battalion No. 289 hi a ngan bik a si ko. Paletwa kiangkap ah a um mi Nungbu le Khawei SAC ralkap sakhaan pawl zong AA nih an laak dih cang,” tiah Delta News Agency ah a chim.
Khuami pakhat nih cun, “Atu hi kahdohnak a faak ngai. Paletwa khuachung ah minung zong an um ti lo. Himnak kawl in an zaam dih cang. AA nih Paletwa khuachung i SAC palik sakhaan an lak cang tiin kan theih. Cuka i palik pawl cu SAC ralkap Battalion No. 289 ah an vung i fonh hna,” tiah a chim ve.
“Khuachung hmun tampi ah AA ralkap pawl nih hmunhma an laak cang. SAC ralkap sakhaan lei in khuachung ah miakpi an rak kah lengmang caah khuami an um ngam lo i, khua a chuah taak mi an tam chin thluahmah,” taih khuami pakhat nih Matupi Times ah a chim ve.
Atu tiang ah cun Paletwa khua hi AA nih an laak le laak lo fiang in theih a si rih lo. Paletwa kiangkap kahdohnak ruang ah ralzaam 20,000 hrawng hi Paletwa peng khua 30 ah an zaam i, ngamdamnak lei sii-ai, eidin tirawl le deu saknak (muka) tibantuk bawmh an herh ngaingai, tiah Paletwa Autonomous District Council nih nizaan ah bawmhhalnak zong an tuah.
