Sami in Paletwa khuachung ca ah motor pathum in facang tun 120 an phurh mi Rakhine hriamtlai phu AA nih an chuh theo hna lai, tiah khuami sin in March 29 zaan ah kan theih.
“Tuzing March 29 zinglei suimilaam 8:00 tluk ah Sami in Paletwa lei ah an i thawh. Facang hi a dihlak an phurh mi tun 200 a si. Motor pahnih hi lampi ah a rawk i an taang. Motor a rawk ca ah motor pakhat nih tun 120 a phurh i an rak lanhter chung. Leymyo (Lemro) tlang a phak lai ah hin motor khaalpa nih kan phan deng cang i facang thlatu ding minung rak i timcia uh tiah zaanlei suimilaam 2:00 hrawng ah phone in a rak kan chawnh. Asinain suimilaam 7:00PM tiang an a phan kho lo. Pehtlaihnak zong kan tuah len nain a phone kan chawn kho ti lo,” tiah khuami pakhat nih The Hakha Post ah a chim.
Paletwa khuapi chung ah ralzaam hi chungkhar in chungkhar 356, minung in 2000 leng an um i, zarh khat chung bawmhnak khoika hmanh in an hmu ti lo tiah kan theih.
Cun, “Kanmah kan zumh ning ahcun AA hriamtlai phu an si ko lai tiah kan zumh. A ruang cu Cozah ralkap lei nih cun atu bantuk in an tuah hrimhrim lai lo. Keimah zong atu hi Sami ah ka um i fianglak in thawng ka thei kho rih lo. Suimilaam 7:45PM tiang thawng ka theih ning ahcun motor khaal pawl hi an thlah cang hna i facang zong tun zeimawzat cu an phurhter than hna tiah ka theih. Hi thawng kan theih mi hi a dik le dik lo cu fiang tein ka chim kho lo,” tiah Paletwa Peng Hluttaw Palai U Myo Htaik nih The Hakha Post ah a chim.
