AA nih Rakhine miphun ca ah dothlennak an tuah nain Paletwa peng chung ah hmun an khuar ca ah Paletwa peng ah kahdohnak a um i AA um hna hlah sehlaw Paletwa peng chung buainak a um lai lo tiah Chin ramkulh Sipin Minister Pu Soe Htet nih June 18 i amah zung chung Chin media hna sin thawngfianhnak a tuah mi ah a chim
“AA nih Rakhine miphun ca ah dothlennak kan tuah an ti nain Chin ramkulh Paletwa peng chung ah hmun an khuar ca ah kahdohnak a chuak i AA hi Paletwa peng chung ah um hna hlah sehlaw Paletwa peng ah buainak a um lai lo. AA nih dothlennak tuah an duh ahcun anmah Rakhine ramchung ah va tuah hna ngat seh. Paletwa ramchung i an rak um tik ah Paletwa tu nih harnak kan tong cang,” tiah Sipin Minister Pu Soe Htet nih Chin media sin ah a chim.
AA kong ah thil dik a chim mi kong he pehtlai in “AA an um ca ah nihin tuzing tiang ah kahdohnak a um peng rih. Mahtin a sining thil dik ka chim ruang ah social media chung ah keimah le Minister hlun Salai Isacc Khen zong kan nunnak lak ding tiang in thihphaihnak an kan tuah kha a si,” tiah Pu Soe Htet nih a chimchap.
Hi AA kong he pehtlai in Pu Soe Htet nih “Hi AA nih an tuah mi dothlennak hi cuti men cun an tlamtlinh lai lo. Zeica tiah atu hi kum hra ceo lawng an si. Kum 70 a si cang mi Tlangcung hriamtlai pawl hmanh nih Cozah he remdaihnak cabuai ah tonbiaruahnak tuah in an kalpi. Cutin an tuah ve awk a si. I kahnak le dohnak in an kal mi nih hin cun zeitik hmanh ah an ram daihnak a chuahpi kho lai lo,” tiah a chim.
Minister Pu Soe Htet cu kan hnu May thla dih lai in Thlanglei Chinram Paletwa peng tiang saupi khual a tlawnnak in a rak tlung i a khualtlawnnak le a hlei in AA hriamtlai ruang ah Paletwa peng ah buainak a chuak i cu buainak nih khuami fimcawnnak le thanchonak fakpi in a dawnhkhanhnak kong zong a chim.###
