Chinram, Paletwa peng chung ah Rakhine hriamtlai AA nawl honhnak tel loin lo kal zong a ngah lo tiah tualchungmi hna nih an chim.
Paletwa khuapi le khuate luhchuahnak kip ah AA nih gate an ser i, khualtlawng lamlimi lawng si loin lo a kalmi pawl zong AA nih hmatpungtin (ID) an hal hna i an check hna.
Tualchungmi pakhat nih, “Khualeng chuah kan duh ah le luh ṭhan kan duh tik ah AA sin ah theihternak tuah peng a hau. Lo a tuahmi kan si caah lo kan kal duh zong ah AA sin ah chimh hmasa a hau. Lo in kan rak kir ṭhan kan duh tik zong ah theihter hmasa lengmang a hau i a har ngaingai,” tiah a chim.
Tlanglo facang zun caan a si nain AA nih lo ah riah an kham caah lo a tuahmi tualchungmi pawl harnak an tong ngaingai fawn.
Cu lawng si loin Paletwa tualchungmi hna i innzuat saṭil pawl cu AA ralkap pawl nih man niam tein tlerhkhawn buin an cawk tawn hna.
Tualchungmi pakhat nih, “A chelcaan ahcun tangka in vok le meheh hi an rak cawk tawn. Asinain, anmah duhmi rate in an kan cawk. Abiana ah Kyat ting 2 man a simi kha Kyat ting 1 lawng hna in an kan cawk i, ‘nan i cenet maw’ tiah a kan ti. Kan lungtling lo zong ah pek an hau. Caan tampi cun nan ‘nan khua kan khangh dih, kan in tlaih hna lai, kan tlaihmi hna sining nan thei ko lo maw’ ti bantuk hna in a kan tlerhkhawh tawn,” tiah Khonumthung thawngzamhnak ah a chim.
AA ralkap pawl nih Paletwa Chinmi pawl cung ah atu bantuk in namnehnak le nuhrin covo buarnak pawl an tuah lawng si loin CNF le CNA he pehtlaihnak nan ngei tiin tualchungmi 15 leng zong an tlaih cang hna.
Paletwa peng ah kahdohnak a um ti lo nain AA nih zalong tein umkalnak nawl an phihkhar pin ah atu bantuk in tlaihkhihnak zong an tuah lengmang caah Paletwa chuahtak in a zaammi ralzaam an um peng rih, tiah thawng kan theih.
