2020 March 14 in 15 zaan tiang AA hriamtlai le Cozah ralkap an i kap i khuami 21 an thi cang, hliam fak a tuar mi 26 hi Mindat sii-inn le Mandalay sii-inn ah an kalpi hna, tiah kan theih.
“AA le Cozah ralkap an i kap. Helicopter in a si i AA nih cun helicopter an ngei lo i Ralkap an si kho men. Tuzing kha ca a phan i minung 21 an thi. 26 hi Mindat le Mandalay sii-inn ah an kalpi hna,” tiah Chin Ramkulh Hluttaw Speaker Pu Zo Bawi nih The Hakha Post ah a chim.
Hi kong ah Cozah ralkap Thawngdik Thanhtu Phu in Bohmugyoke Zaw Min Tun nih, “Kan i kahnak tawn ah minung umnak hmun kan i sel bal lo. Atu zong hi a si lo i hmailei zong ah khuami hnursuang ding kah kan tim hna lo,” tiah RFA ah a fianter.
Hi kahdohnak Meiksa 3 khua ah hin inn 40 hrawng an um i minung 70 khua an sa. Meiksa 2 ah hin inn 70 le minung 170 hrawng an um.
Hi kahdohnak kong he pehtlai in Chin Ramkulh Cozah Chimphuannak Nawlngeitu Sipin Minister Pu Soe Htet kan pehtlaih nain kan pehtlai kho lo.
Paletwa ah hin AA le Cozah ralkap kahdohnak ruang ah hartong ralzaam tampi an um pin ah atulio taanghra camipuai zong a phi kho lo mi tampi an um, tiah kan theih.
