Nizan February 12 zinglei suimilaam 10:00 hrawng ah Sagaing ramthen, Pale le Salingyi aa tonnak lampi cung ah motor pathum le motorcycle pakhat in a kal mi rammi rungvengtu ralkap hna cu ralhraang nih timh cia tein an bawh hna i an kah hna tiah theih a si.
Ruahlopi in kah an ton mi a si caah rammi rungvengtu phu chung in minung 5 cu a hmun ah an nunnak liam colh i a dang pahnih cu a pawng leikuang ah tukvelhnak hma he an an ruak kan hmuh hna, tiah Pale Public Administration nih an chim.
‘‘Ralhraang cu Salingyi, Kyartet khua ah an lut cang ti thawng kan theih i kan mipi ralkap 35 cu motor 3 le cycle 1 in zalong tein an rak chuak. Ralhraang 60 leng nih Pacauk pung in an rak bawh hna. Kan ralkap pawl an phak bak ah an kah colh hna. Kanmah lei kam in thawng hlatnak kan der caah si,” tiah Pale peng Public Administration tuanvo ngei nih a chim.
A hmun ah a thi mi hna cu ralhraang nih motor he an rak khangh hna caah, cuka ah cun kan phum beh hna. Leikuang i kan hmuh mi hna an ruak tu cu chungkhar sin ah kan kalpi hna tiah a chim.
