Chin Ramkulh, Tedim Peng, Ngente khuami minung pahnih hna cu a tur um mi paa an ei ruang ah an pahnih in an nunnak a liam tiah thawng kan theih.
Paa ei ruang ah a thi mi hna hi Pu Pau Khan Suang (kum 40) le a fapa Salai Pau Khanh Ein (kum 9) hna an si.
An thihnak kong he pehtlai in Tedim sii-inn uk Dr. Zaw Myint Naing nih, “ June 22 le 23 ah Tedim sii-inn ah an rak ratpi hna. Paa a ei mi hna hi Pu Puk Khan Suang (kum 40) le a chungkhar a si mi Pi Cing San Nuam, Mai Man San Cin le Salai Pau Khanh Ein hna an si. An thihnak a ruang bik hi paa tha lo an ei ca ah a si,” tiah The Hakha Post ah a chim.
A taang mi minung pahnih zong hi Tedim sii-inn pi ah an chiah lio hna a si i, an dam ngai ko tiah Tedim sii-inn uk nih a chimchap.
“Paa ei ruang ah Chin Ramkulh chung kumfatin a thi mi le sii-inn a phan mi hi kan um pah lengmang ca ah mi zeipoh nih kan i ralring awk a si,” tiah Chin Ramkulh Ngandamnak Zung le Zaanglek Zung lutlai Dr. Aung Ngew San nih The Hakha Post ah a chim.
Cun, Tedim khuapi Lawibual sang a ummi Pu Gin Za Dung fanu Mai Cin Sian Muan Nuam (kum 16) zong paa ei ruang ah a paw a fak, a luak a luak i sii-inn ah an chiah tiah thawng kan theih.
