A ralai mi October zarh khatnak asiloah zarh hnihnak ah Hakha University, Surbung Vanlawngbual le Vaar hlei honnak an tuah lai, tiah tuanvo ngeitu sin in September 7 ah kan theih.
“A nicaan taktak cu chim khawh a si rih lo nain October zarh khatnak asiloah zarh hnihnak tal ahcun honnak kan tuah ko lai. Vice President-2 Pu Henry Van Thio le Ministers dang an ra te theo lai. Cun, mi dangdang zong an rak ra kho ko, chim awk a tha deuh rih lo,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Hakha College cu Ramkomh Ngamdamnak Zung nih August 31 ah University tling ah a pek cang i degree laknak hall an sak lio a si. Vaar hlei zong lim a si cang. Surbung vanlawngbual zong vanlawng a tumnak zawn an kauhchap lio a si i a rauh hlan ah an lim ve lai. October thla chung ah honnak an tuah lai, tiah kan theih.
