May 17 ah NUG Cozah Federal Unit hna karlak Tuanrelṭinak Commission (FSCC) le Chinland Council a voi khatnak tonnak an ngei i, kap hnih i bawm in riantuanṭi ding hnatlaknak an ngei tiah NUG nih a thanh.
Online in tuah mi tonbiaruahnak ah NUG lei in FSCC Chairman NUG Acting President Duwa Lashi La, Vice Chairman Prime Minister Man Win Khine Than, FSCC chungtel NUG minister hna le Secretary chungtel pawl an i tel.
Chinland Council lei in Chairman Pu Zing Cung, Hluttaw Lutlai Pu Hung Naing, Chief Minister Pu Pa Thang, Biaceih Bawizik Pu Thomas Thang No le ṭuanvo ngeitu hna an i tel tiah theih a si.
FSCC le Chinland Council nih i hmaithlakṭi ding rian phun li hnatlaknak kan ngei tiah an thanh nain, zei rian pawl dah a si ti mi tu cu a dikthlir in an langhter lo. Cu an i hmaithlak mi rian kong ah tonnak ngeih lengmang ding zong hnatlaknak an ngei tiah theih a si.
