National Reconciliation and Peace Center (NRPC) tawlrelnak in le Myanmar Institute For Peace and Security (MIPS), Plan International bawmhchanhnak in Hakha College ah Mino le Remdeihnak (Youth & Peace) biaruahnak 2020 March 2 ah an tuah tiah kan theih.
Hi kong he pehtlai in Committee chung tel Salai Ngun Ceu Mang nih, “Hi kan tuah mi hi a liam cia kum 2019 in a hram kan thok, kum 2019 chung ah voi thum kan tuah. Hakha ca ah lutlai pahnih le member minung 5 kan um. Cun, a ra lai ding mi June 26 ni zong ah Chin miphun mi chung in kan i bochan mi kan pa le si hna seh, hmun dangdang i bochan awk a tlak mi zong si hna seh kan sawm hna lai i Talk Show phun tuah kan i tim. Mino tampi nih nan rak kan telpi nak lai zong kan in sawm hna,” tiah The Hakha Post ah a chim.
Youth & Peace biaruahnak hmun hi Myanmar ram chung Kachin, Shan, Rakhine, Yangon, Mandalay, Mon le Chin (Hakha) ah a um cang. 2020 kum chung Hakha ah voi 4 tuah ding an si.
Cun, “Youth an Peace timi tlangtar in biaruahnak kan tuah mi thawng in kanmah siangngakchia pakhat le pakhat kar ah i theihthiamnak, remdeihnak timi zong hlannak in tampi kan i fiang deuh lai timi ruahchannak nganpi kan ngei. Remdeihnak kong ah atu tein mino kan dihlak fekfuan tein kan dirpi lawnglawng ah hmailei caan ah hmunkhat te ah lungrual tein kan tuan ti khawh lai, kan dirhkamh khawh lai. Hi bantukk in mino lawng te 40,50 hranwg kan van i ton i bia kan i ruah tik ah pakhat le pakhat ruahnak kan i cheuh mi hi a tha tuk, a nuamh zong kan i nuam tuk,” tiah Committee chung tel Mai Rebecca Van Sui Hlei Iang nih The Hakha Post ah a chim.
