National League for Democracy (NLD) nih tlangcung party hna i an duhnak biapiter ding le biapi ah chiahpiak ding in 2020 November 12 ah cathanh an chuah tiah theih a si.
Hi cathanh an chuah mi chung ah tlangcung party 48 hna he Myanmar ram hmailei tuan ding in timhmi le duhnak biapi ah chiahpiak ding phone in siseh, cathanh in siseh, email in siseh a kuat dih hna tiah kan theih.
Hi cathanh an chuah mi kong he pehtlai in, Chin Ramkulh NLD Chairman le Hluttaw Speaker Pu Zo Bawi nih, “Ca cu kuat dih a si cang nain, cutin tuahpiak ding khatin tuahpiak ding timi policy chuah mi cu a um rih lo,” tiah The Hakha Post ah a chim.
2020 kum thimnak a phichuak hi tlangcung party cheukhat hna ca ahcun an i tinh ning bantuk a si ko nain, cheukhat party hna cu an i tinh ning bantuk in a phi a chuak kho lo tiah NLD nih ca an chuanh mi chung ah aa tel.
Cun, hi ca an chuah mi kong he pehtlai in Chin National League for Democracy (CNLD) party General Secretary Salai Ceu Bik Thawng nih , “Hihi cu, anmah nih zeiti ngaingai indah tlangcung party hna he rian kan tuanti lai, zeitin riantuanti dah an duh ti biahal awk a um ve. Cun, Cozah serti ding hi teh aa tim taktak ko maw ti zong ruah a phu. Cun, atu bantuk in ca a chuahnak le a kan kuatnak zong hi ramdang lei ram hruaitu hna zong nih, teinak ka hmuh aipat tiin nangmah lawng nih Cozah na ser awk a si lo tiah ruahnak an pek. Hihi ruahnak pek mi hi a ruahmi a si hnga maw ti zong kan ruat. Cun, tutan thimnak zong ah party dangdang zong nih thimnak kong ah an nor ngaingai. Mee thlak ning zong ah NLD nih ningcang loin a tuah ti bantuk pawl bia a chuak mizong zapi theih a si. Hi bantuk a chuah tik ah a ca ah thilhar ngai zong a si lai. Atu an kan ti mi zong hi lung thiang tein an kan ti mi a si ko ti hi cu chim ngam a si lo. Buainak a chuah pah tik ah thinlung merhnak ah a chim sawh mi hna a si hnga maw ti hi tlangcung party hna nih ruah cio mi a si,” tiah The Hakha Post ah a chim.
“Lungthiang tein, tlangcung party hna mah le miphun ca cio ah an biapi tuk tiin a zapei an kan chanh mi a si ahcun, tlangcung party hna zong nih lunglawm te le lung thiang tein kan cohlan khawh ve ko,” tiah Salai Ceu Bik Thawng nih a chimchap.
Union Election Commission zung nih a thanh ning ah 2020 kum thimnak ahhin NLD nih Union Cozah ser khawh nakding Hluttaw thutdan 322 leeng cu teinak a hmuh cang.
Cun, Karen National Democratic Party (KNDP) Chairman U Man Aung Pyi Soe nih, “Daw Aung San Suu Kyi hi tlangcung mi hna sin ah biakamnak an kan tuahmi zong hi a tam ngai cang nain a biakam a tlinh bal lo. 2008 phunghram kan remh lai a ti, hei chia rih ko usih. Ralkap 25% a um ca ah. Cun, remdaihnak kong biatak tein kan tuan lai a ti i zeihmanh a um rih lo nihin tiang ah. Hi bantuk a si ca ah atu a kan timi zong hi kan zum thlu lo. Lungthiang tein a kan ti i, a tak a tlinter a si cun kanmah lei zong nih lunglawm tein kan don ko,” tiah The Hakha Post ah a chim.
Tlangcung party hna nih an duh dih mi cu, mah le Ramkulh cio ah mah tein Chief Minister i khinh i, mah tein i uk ding hi an rak duh dih cio mi a si. 2016 kum ahkhan NLD nih Chief Minister 14 hna cu anmah NLD party chung lawng in Chief Minister ah a rak khinh hna tiah theih a si.
Photo/ Internet
