Daw Aung San Suu Kyi President si khawh nakding a khamtu phunghram caang 59 (f) cu Pyidaungsu Hluttaw nih thimfung an thlak i thim mi Palai zatuak 80% leng nih an thlak nain thimlo mi Ralkap nih thimfung an thlak duhlo ca ah an sung.
Thimfung thlatu Hluttaw Palai hi 635 an si i phunghram caang 59 (f) remh a duh mi 393 lawng mee a si ca ah zatuak 75% cung a si lo i an sung. Hihi thim mi lei cun zatuak 80% mee a si nain thimlo mi Ralkap nih mee an thlak duhlo ca ah kan sungh mi a si, tiah NLD Hluttaw Palai hna nih an chim.
Hi phunghram 59 (f) duh loin thimfung a thlatu hi Ralkap Hluttaw Palai 166, USDP Palai 40 le National Unity Party Palai 1 nih duhlonak mee an thlak, tiah ruahdamh a si.
USDP Hluttaw Palai U Thung Aye nih, “Phunghram caang 59 (f) remhlo ding biachah a si mi hi ram pumpi nih teinak kan hmuh bantuk a si. Zeicahtiah, hi phunghram caang 59 (f) zawn hi ram hruaitu ding dirhmun zawn a si tik ah kanmah ram cu ramdangmi nih uk le hruai kan duhlo i mah kutcungte kan ram a um khawh nakding phunghram a si ca ah remhlo ding an ti mi hi teinak kan hmuh ka tinak a si,” tiah a chim.
Thimfung an thlak ning tuak tik ah NLD le Tlangcung Party Palai 428 chung ah phunghram caang 59 (f) a duh mi Palai 393 an um i a duhlotu Tlangcung Party in Palai 35 hrawng an um lai, tiah zumh a si. NLD Palai 377 meeting an kai i phunghram caang pakhatkhat tei nakding ah Palai 491 thimfung a herh. Hi phunghram remhnak ah Tlangcungmi Party Palai tam deuh nih an duhlo ti a lang. (Ref: RFA)
