2015 kum in 2020 kum kar Chin Ramkulh Cozah a tlaitu National League For Democracy party (NLD) nih kum nga chung ah a hruai ning, rian a tuan mi kong he pehtlai in ramkheel lei a cuan mi hna nih an hmuh ning a tanglei bantuk in kan rak langhter.
Salai Mangom (Mindat)
Kei hi party tanhhlei mi ka ngei lo. 2015-2020 kar kan zoh tik ah Life nad Foundation riantuannak hi phihkharnak a tam deuh. Democracy uknak tang ah kan um kan ti a si ahcun, zalong tein zei bantuk minung zong nih chimphuannak nawl kan neih awk a si. Asinain hi covo pawl hi kan sung ngaingai. Cun, cunglei ukhruainak a tam tuk deuh. Hi bantuk in cunglei ukhruainak a tam deuh zong hi an phunghram ruang ah a si.
Cunglei ukhruainak le nawlngeihnak a tam tuk tik ah Ramkulh chung ahhin lungduh in i hruai khawh a si lo. Cucaah, Federal a uartu pakhat ka sinak in ka cuanh tik ah NLD Cozah hi ka lung a si lo ngaingai. Cun, Chin Ramkulh, NLD hi thleidannak an ngei. Tender Project lei hrimhrim ahhin tlukruang tein an tawlrel lo. Anmah a dirpi tu le anmah party minung lawng an pek hna. 2020 kum thimnak ah NLD nih teinak an hmuh a si ahcun, tha deuh le rem deuh in rian kan tuanpiak cang hna seh ti hi ka duh ko, tiah a chim.
Dr. Law Ha Ling (CBC)
2008 phunghram kan remh lai tiah an au lengmang mi hi ruah phu ngai a si. 2008 phunghram remhnak ahcun ralkap a biapi ticu zapi theih a si ko. NLD nih ka remh lai tiah 2015 thimnak ah a rak au. Nain a remh kho lo. A remh khawh lo cu ruahthiam a si ko. Nain remh aa timh bak lomi hi a poi. Cuti a remh lomi cu tutan thim nak ding ca zong ah ka remh lai tiah a au than rihmi hicu a chimtu maw kan palh deuh (or) a zumtu hi dek?
Uhtanh phun in chim ka duhmi cu, Chin ramkulh cozah hi a lung aa rual lo ngaimi Chin miphun ca ah rian a tuanmi a um bak lo. Cuti a tuan lo pin ah, biaknak lei in tuan kan timhmi hmanh hi a kan phihkhar theo. A kan kham. Cucaah cozah tlaitu cu NLD an si ko caah an tuanning hi lung a tling dih kho hrim lo.
