NLD nih Cozah a tlaih hnu kum 5 chung ah Chin Ramkulh Cozah nih kum fatin budget a tam deuh cu lamsul lei ah an hman, tiah kan theih.
“Chin Ramkulh Cozah nih Budget kan hman ning a tlangpi kan chim ahcun, NLD Cozah a kai hnu ah kum fatin tangka kan hmannak bik cu lamsul lei ah a si. 2016-2017 tangka kum ah lamsul lei kan hman mi hi, zatuak 77.59 a si. 2017-2018 tangka kum ah zatuak 66.54 kan hman. 2018-2019 tangka kum ah zatuak 57.91 kan hman. 2029-2020 tangka kum ah zatuak 55.78 kan hman. A ralai mi 2020-2021 tangka kum ah 63.72 kan hman lai. Chin Ramkulh cu lamsul lei a that lo ca ah a bik in lamsul lei kan tuan ve. 2020-2021 tangka kum ah budget a tla mi hi a tangka in 104 Billion a si. 91.952 Billion hi lamsul lei ah hman ding a si. Lam kan ti tik ah, Sakremhnak lam, Na-ta-lah lam le khuate lam tiin a um,” tiah Chin Ramkulh Cozah Chimphuannak Nawlngeitu Sipin le Electric Minister Pu Soe Htet nih Media he tonbiaruahnak ah a chim.
Lam hi Hakha Peng ah meng 204, Thantlang Peng ah meng 156 le farlong 2, Falam Peng ah meng 191 le farlong 1, Tedim Peng meng 109 le farlong 7, Tonzang Peng ah meng 70 le farlong 1, Mindat Peng ah meng 104 le farlong 6, Kanpetlet Peng ah meng 57 le farlong 2, Matupi Peng ah meng 320 le farlong 6, Paletwa ah meng 113 le farlong 2 a si. Lam a sau hoih zoh in remh le tuah ruang ah Budget tete aa dangnak a si, tiah kan theih.
“Chin Ramkulh Cozah nih kum fatin budget a thenphawt tik ah a tlukrual lo a ti mi an um pah tawn. Budget thenphawt ning kong a tlangpi in kan chim ahcun, Peng kip ah riantuan mi he aa pehtlai. Peng ah rian an tuan mi cung ah budget hi kan thlak. Peng kip cio in Hluttaw Palai le Zung nih an kan hal ning in kan pek hna. Cu tik ah, amah le rian in aa dang cio. Tahchunnak ah, Sipin, Electric, ngandamnak lei, fimcawnnak lei tibantuk in a dang cio. A bik in, khuate thanchonak lei ah a herh deuh mi cu tam deuh pek zong an si. Budget a tla ko nain, riantuan khawh lo mi tete zong a um ve. Cu tik ah budget thenphawt ning hi aa tlukrual lo mi tete zong a um kho. Kanmah Chin Ramkulh Cozah lei cun, kum fatin Budget kan thenphawh ning hi a si khawh chung in aa tlukrual tein kan thenphawt ko. Peng kip Hluttaw Palai nih a lungtlin mi kha Chin Ramkulh Cozah nih a lungtlinpi hnu ah Pyidaungsu Cozah sin ah kan chim tawn,” tiah a chimchap.
