NLD nih Chin Ramkulh khuakip ah tlawng in party signboard taarchap ding le committee a bau mi thim than ding in timhtuahnak an ngei, tiah January 23 ah kan theih.
“Mee pek sawmnak le thanghphawhnak si loin party chung in upa cheukhat cu a phuphu in kan i then lai i Chin Ramkulh khuakip ah kan tlawng lai. Party signboard thar siseh, taarchap hau mi pawl kan taar lai. Cun, committee chungtel a bau mi (tahchunhnak ah a thi mi) kha a thar in thimnak zong kan tuah lai. Mee pek sawm cu a si rih lo. Union Election Committee (UEC) nih phungluut in a thanh hnu lawng ah mee pek sawm in khual kan tlawng te lai,” tiah Chin Ramkulh NLD Chairman le atulio Ramkulh Hluttaw Speaker Pu Zo Bawi nih The Hakha Post ah a chim.
The Voice of Democracy thawngzamhca nih, “Hakha NLD upa hna cu a ralai mi October in Peng khuate kip ah khual an tlawng lai. Signboard taarnak, 2019-2020 kum Cozah nih khuatelei thanchonak rian a tuan mi, lamsuul, sianginn le dinti tibantuk a tuancia mi, a tuan lio mi le a tuan lai mi pawl an zohfel lai,” tiah January 20 ah a tial. (By: KB)
