National League for Democracy (NLD) le Chin National League for Democracy (CNLD) nih zuam cawh tlak lo ah an kan ruah tak men ko lai, asinain kannih cu midai kan si, ram ca riantuan lawnglawng a ruat mi kan si ca ah a si, tiah USDP in Dr. Hmuh Thang nih July 30 ah fianternak a tuah.
Nizaan naihrawng Chin ramkheel thlihran le party dangdang nih an biachim ning zoh tik ah USDP hi zuamcawh awktlak ah an in ruah tung hna lo, zeitindah bialeh na duh hna, tiin biahalnak kan tuah mi he pehtlai in, atu bantuk in atulio Chin Ramkulh USDP Chairman le Hluttaw Palai Dr. Hmuh Thang nih a fianter hi a si.
“Kannih cu midai kan si ca ah kan thawngpang zong a dai ko lai. Asinain, a chung in rian kan tuan ko. Kannih cu pumpak zong in, party min zong in zeitik hmanh ah mi soisel kha kan duh lo. Kannih nih kan hmuh mi le kan ruah mi cu ram le miphun ca riantuan bak kha a si ko. A ngaingai cu, kan party hi party hme sawhsawh a si lo, party nganpi kan si ve. Asinain, ram le miphun ca ah zeitluk in dah rian kan tuan khawh lai. Chinram cu sifak santlailo kan si ca ah zeitindah kan pawcawmnak kan thanchoter lai ti mi le lothlo in paw aa cawm mi hna zeitindah an nun kan thanter khawh lai, ti hi kan ruat peng. Cucaah, kannih cu midai kan si. A thli tu in biatak tein riantuan mi kan si, ka tinak a si,” tiah Dr. Hmuh Thang nih The Hakha Post ah a chim.
Capo in USDP hi an um ve maw, ti hna in an kan ti ko. A ngaingai cu, khati bia a chimtu kha kanmah nih kan rak sersiam mi minung a si. Pu Hung Ngai chan ah zeitluk in dah Chinram ca ah rian kan tuan ti mi cu mizapi mithmuh a si ko. Lothlo in paw aa cawm mi hna, mirum an rum tuk i sifak mi kan sifah tuk mi te hna hi kan doh hrimhrim lai. Cucaah, kannih cu mi va soisel len nakin dai tein ram ca ah riantuan tu hi kan i tim deuh, ti zong a cunglei upa nih a chim fawn.
