2021-2025 kum karlak Myanmar ram Cozah pi a tlaitu ding National League For Democracy (NLD) nih 2020 November 8 i thimnak tuahnak Chin pary chung in ZCD le CNLD party hna cu riantuan ti ding in biaruahnak an ngeih hna lai tiah theih a si.
NLD party lei nih tlangcung party (miphun party) hna he riantuan ti ding in 2020 kum thimnak i teinak a hmu mi party dihlak he biaruahnak ngeih dih ding in timhlamhnak an ngei. 2020 December 31 ahkhan Kachin party hna he ton biaruahnak an ngei cang tiah theih a si.
CNLD le ZCD party he ton biaruah ding kong he pehtlai in Chin Ramkulh NLD Chairman le Hluttaw Speaker Pu Zo Bawi nih, “Party lei in tlangcung party hna he riantuan ding hi biatak tein aa hmaithlak mi a si bantuk in atu hi tlangcung party kip sin ah biaruahnak zong a ngei cuahmah. Kachin, Shan le a dangdang cu an kal dih cang. Kanmah Laitlang chung tu ahhin cun teinak a hmu mi CNLD le ZCD he tonnak le biaruahnak a ngei ding kan si. Zeitik ahdah kan ton hna lai i, bia kan ruah hna lai ti cu aa fiang rih lo,” tiah The Hakha Post ah a chim.
2020 kum Myanmar ram Democracy thimnak Chin Ramkulh chung ah teinak a hmu tam cem hi NLD an si. Cun, ZCD party nih minung pali in a pahnihnak le CNLD party in minung pakhat nih teinak an hmuh ve.
NLD Palai hna nih ZCD an ton hna ding kong he pehtlai in ZCD party Secretary Pu Gin Kam Lian nih, “NLD lei nih tlangcung party hna he riantuan ti ding in tiah sawmnak ca an kan kuat. Kannih cu ton biaruahnak ngeih a si ahcun a bik in, thutdan hmun kong nakin bia i ruah ding an tlangtar tu hi biapi ah kan chiah lai,” tiah Khonumtung Media ah a chim.
NLD Hluttaw Palai lei nih 2021 January 10 zong ahkhan Kayah party le Shan party hna zong ton biaruahnak an va ngeih hna tiah theih a si.
Cun, CNLD party chimphuannak nawlngeitu Salai PP nih, “NLD lei nih anmah he rampi ca ah riantuan ding in thimnak a dih hnu ah sawmnak ca an kan pek. Sawmnak ca an kan pek mi cu lunglawm tein kan cohlan i lungtlinnak kan ngei ko tiah kan leh ve hna. Zeitik ahdah an kan ton te lai ti cu kan thei kho rih lo. A nicaan a fiang rih lo. An kan ton i bia kan i ruah a si ahcun, kan party policy hram bunh in bia kan ruah te hna lai,” tiah The Hakha Post ah a chim
