Ramkulh cheukhat um, thimnak i teinak a hmu mi tlangcung party hna he ton biaruahnak a ngeimi NLD party lei nih ton biaruah ding kong ah zeihmanh thawngthanh nak a um rih lo tiah Arakan National Party (ANP) le Chin National League for Democracy Party (CNLD) lei in rian ngeitu hna nih 2021 January 20 ah an chim.
“CNLD party cu thimnak a dih tlawmpal ahkhan sawmnak zong an kan pek ko nain, nihin tiang NLD lei nih thawng an kan thanh than mi a um rih lo. Hi sawmnak ca an kan kuat mi chung ah aa tel mi cu, Democracy Federal Pyidaungsu kongkau ah tlangcung mi hna he tuan ti ding le telpi ding in tiah aa tel. Ton biaruah taktak ding in an kan ti a si ahcun, kannih cu kan party tlaihtleng policy hrambunh in bia kan ruah ve hna lai,” tiah CNLD party General Secretary Salai Ceu Bik Thawng nih The Hakha Post ah a chim.
Ramkulh cheukhat um thimnak ah teinak a hmu mi party hna hi NLD lei nih ton biaruahnak an ngeih cangmi zong an um. Asinain, Rakhine, Chin le Karen lei party pawl cu nihin tiang zeihmanh thawngthanh thannak a um rih lo tiah theih a si.
Cun, ANP party Chairman U Thar Tun Hla nih, “ANP party lei zong zeihmanh thawngthanh thannak a um rih lo. Social Media cung i an chim mi tluk lawng khi a si rih. Cun, NLD in rianngei cheukhat hna zong nih Rakhine ram cu runvennak ca ah zumh awktlak a si rih lo i, anmah he bia i ruahti ding hi cu a si kho rih theng lai lo a ti. Hi bantuk in a si ca ah bia kan ruah hna lai maw ruah lo ti hi anmah NLD party tu kan hal than hna ding a si,” tiah The Hakha Post ah a chim.
2020 kum Myanmar ram party tling Democracy thimnak ah ANP party nih Rakhine ram ah mee hmun 15, CNLD nih Chin Ramkulh chung ah mee hmun pakhat le Karen party nih mee hmun pakhat lawng teinak an hmu.
Cun, Salai Ceu Bik Thawng nih, “NLD hruaitu cheukhat nih an chim ning ah Rakhine ram hi cu runvennak lei ah zumh ngam tuk ding a si rih lo tiah an chim. Kannih Chin le Karen tu hi cu tlangcung party nih teinak kan hmuhnak mee hmun a tlawm ca ah an lung ah a um lo zong a si kho mi a si. Cu a si lo hmanh ah duhsah in kan ton te hna lai ti an ruah zong a si kho,” tiah a chimchap.
Cozah thar a kai chung miphun rualrem tein kan um i, rian kan tuahti khawh naklai timi ruahchannak in tlangcung party hna hi pakhat hnu pakhat in ton biaruahnak kan ngeih mi hna hi a si tiah NLD nih an thanh.
