NLD cozah nih kum 5 chung rian a tuannak zoh tik ah media rian tuannak ah zalonnak a zor, thawngpang laknak zong ah harnak an um, zalong tein thawngpang laknak nawl a buar i, cozah ngeih mi media lawng nih hmunhma a lak caah, private thawngzamhnak rian hna cu pakhat hnu pakhat in an zor tiah theih a si.
Ram chung ah pumpak in media riantuan khawhnak cu kum 2013 April thla khan rak pek a si i, cozah thawngthanhnak zung cazin ning incun media 37 tluk hrawng nih nichiar rak chuah a si. Nain NLD cozah nih rian a van tlaih in 2020 kum dih lei ahcun nichiar in a chuah khotu Media hi phu 5 hrawng lawng an tang tiah theih a si.
A liamcia 2015 rampi thimnak ah NLD cozah nih teinak a van hmuh in private media hna nih media zalonnak a um deuh lai i, cozah ngeih mi thawngzamhnak rian zong a phih lai tiah ruahchannak rak ngeih a si. Nain cozah thawngzamh ca hna phihkhar cu chim lo thanchoter ding in rian an tuan bantuk a si i, private thawngzamh ca thanchonak zong hnu a chiah tiah ruah a si.
Cupin ah, COVID-19 zawtnak ruang ah khua khat le khua khat kar luhchuahnak nawl hna van phihkhar an si tikah thawngzamhca zuarnak lei zong ah harnak a van chuak chinchin i, private thawngzamh bu hna an dir khawh ti lonak pakhat a si chih tiah theih a si. Cu private thawngzamh bu hna nih harnak an tong ko nain cozah lei in a pel zong bawmhnak a tuah lo tiah theih a si.
2015 Myanmar ram thim lai Daw Aung San Suu Kyi nih cozah an ser hlan i Yangon ah Journal kong tonpumhnak an rak ngeih lio bia chimnak a rak tuah lio ahcun Media hna zalong tein cawlcangh khawhnak ah thazang kan pek lai tiah a rak chim bal tiah theih a si.
NLD cozah an tlaih in kum 5 chung ah tazacuai cang mi Thawngzamh riantuantu minung 67 an um cang. Hi zat minung hi a dihcia mi cozah kuttang hmanh ah an um lo. Cun, Rakhine le Chin state chung hna ah internet line phih te hna le thawngzamh bu hna nih an ngeih mi website te hna rel kho lo ding cozah lei nih rak tuahpiak ti bantuk hna an tuah tik ah thawngzamh bu riantuannak ah zalonnak a um lo, tiah kan tinak cu a si.
Rakhine ramkulh hrambunh a si mi Development Media Group (DMG) ah riantuantu Aung Kyaw Min nih Maungtaw hlei a rawk mi rianrang tein remh a herhnak kong a tial ruang ah cozah nih 2020 December 11 ah tazacuainak a tuah. Cun, AA ralkap kong a tial ruang ah Khet Tit media editor Khan Myat Kyaw zong thongthlak a rak si.
Cun, thawnglatu hna nih thawng an lak tik ah rak tlirhkhawnhnak a tam i, tazacuai mi zong President hlun Thein Sein lio nak in a tam deuh tiah theih a si. Mandalay hrambunh Voice of Myanmar Editor Ney Myo Lin zong rak tlaih a si bal tiah theih a si.
Channel Mandalay thawngzamhbu i reporter Aung Kyi Myint zong Alpha Biletmee sehzung sinmanking duhnak langhternak ah thawngpang la in live a thlah ruang ah thong kum 2 thlah a si ve tiah theih a si. Cu lawng si loin Rakhine buaibainak ruang ah Reuters thawngzamh bu ah riantuantu minung zong kum sau thong tla ding in bia khiah piak an rak si nain ram chung ramleng in auhnawh an si caah thlah than an si.
France hrambunh RSF bu nih kum chiar hlathlainak an tuah tawn mi thanhnak an tuah ning ahcun NLD cozah a kai hnu in kum 1 ah Myanmar ram thawngzamh bu zalong in rian an tuan kho maw tuan kho lo timi tahfung an tuah mi ah 2017 ahkhan 131 nak ah rak um. Kum 2018 ahcun 137 nak ah a tum i, kum 2019 ah 138 ah a tum than. Cutin kum 2020 ahcun 139 nak pehzulh in a tum tiah thanhnak an tuah.
(Ref: RFA)
