Sagaing ramthen, Taze peng nihin kahdohnak ah ralhraang 15 hrawng an thih lai tiah zumh a si i, nizan kahdohnak ah ralhraang hliam a tuar mi chung in 5 an thi than tiah Taze PDF sin in theih a si.
September 19, zing suimilaam 2:00 hrawng ah Taze peng Beyin khua in Htanpinsat khua lei ah hmainawr in a ra mi ralhraang le Pyo Saw Htee hna cu tualchung LDF phukomh nih bomb in voi hnih an puah hna i 15 hrawng thi le hliamtuar an si lai tiah an zumh. Ralhraang 100 hrawng le Pyo Saw Htee hna cu Htanpinsat le Phattharkone khua pawng ah tualchung PDF phukomh nih bomb in an puah hna hi a si i ralhraang lei thi le hliamtuar an tam ca ah zaan mui le ruahsur lak ah Beyin khua lei ah an kir than tiah HPS nawlngeitu nih Yangon Khit Thit ah a chim.
Taze khua Shwedaungmin checkgate ah a um mi ralhraang le Pyo Saw Htee 40 hrawng hna cu September 19, zaanlei suimilaam 4:00 hrawng ah Taze PDF battalion 6 le Pah Kah Pha phukomh nih hriamngan voi 3 le hriamhme in lamnaih tein an kah hna ca ah ralhraang lei thi le hliamtuar an um nain dikthlir in cun kan thei kho lo tiah Taze khua mi pakhat nih a chim.
A luancia september 17 lio i kaphnih kar kahdohnak ah Ralhraang Tatmah 33 in 17 an thi i hliam tuar 20 hrawng an um. Taze peng Aungchianthar khua ah bomb voi 3 an puah hna. Aungchianthar, Ye-Ookone le Tharyarkone khua ah kahdohnak voi thum a chuak i ralhraang a thi mi ruak 12 le hliam tuar 20 hrawng cu zaan ah leeng 4 in Pyo Sw Htee sakhaan umnak Gyunlau khua ah an kalpi hna tiah kan theih.
Hliam a tuar mi hna cu Taze peng, Gyunlay khua in Nichuah lei Kanbilu peng, Moekaung khua ah an thlop hna lio September 18 ah 5 an thi than tiah ralhraang chung um thawngpetu nih thawng an kan thanh tiah Taze PDF pakhat nih Yangon Khit Thit Media ah chim. (Source: Khit Thit Media)
