SAC ralhraang le Chin ralkap komh hna kar kahdohnak cu pehtlai in a faak i nihin April 21 ah CNA ralkap pahnih nih ram le miphun ca ah an nunnak an pek than tiah kan theih.
Tedim peng Zimte khua pawng CNA ralkap umnak hmun pakhat cu SAC nih vanlawng in bomb a thlak ca ah, cuka kahdohnak hmun ah cun CNA ralkap Ko Ying (Paletwa) nih ram le miphun ca ah a nunnak a pek, hma a pu mi zong an um tiah kan theih. Cun CNA ralkap Salai Ngun Hlei Thang (Ramthlo) zong ralram hmun pakhat ah a nunnak a liam tiah kan theih.
“Salai Ko Ying hi Jet vanglawng bomb thlaknak in a nunnak a liam. Salai Ngun Hlei Thang hi raal ram hmun pakhat ah a nunnak a liam ve,” tiah thawnghram nih THP ah a chim.
March 7 ah Kalay in a rak i thawh mi SAC motor tlar le ralhraang 200 hrawng cu Chinland ralkap pawl nih lam thluan chuak an kah hna i ralhraang a tam deuh cu an thi hma an pu. Armoured vehicle pahnih tel in ralhraang thilri phortu motor dihlak cu CNA le CDF phu komh nih an hrawh khawh dih. Ralhraang a taang mi pawl cu Chuncung khua ah umhmun an khuar tiah kan theih.
Cuti cun, hmun kip kahdohnak ah SAC lei an sungh mi a fah ca ah SAC nih pehtlai in Chin ram hmun tampi ah vanlawng in bomb a thlak. Chin ralkap pawl he an i kahnak hmun lawng siloin sualnak ngei lo rammi tiang timh ciammam in bomb a thlak hna ca ah a thi mi le hma pu tampi an um.
SAC ralhraang pawl cu Chin ralkap nih an kham cuahmah hna i, nizan April 20, Hakha peng Leium khua pawng kahdohnak zong ah CNA ralkap pahnih nih ram le miphun ca ah an nunnak an pek tiah kan theih.
