Shan ramkulh Chaklei Lashio khuapi hrambunh Nichuah Chaklei SAC ralkap hmunpi (North Eastern Command) kan laak khawh cang tiah Kokang hriamtlai MNDAA nih nihin, July 25 zinglei ah a thanh.
“Ni 23 chung kahdohnak hnu ah MNDAA nih Lashio khuapi ah a um mi Nichuah Chaklei Ralkap Hmunpi cu July 25 zinglei sml. 4:00 ah kan laak khawh. Lashio khuapi a luat cang tiah MNDAA Ralram Headquarters nih a thanh. Lashio khuapi luat nakding dohthlennak cu ro a ling mi teinak a si,” tiah MNDAA nih a thanh.
Lashio khua laak kahdohnak cu MNDAA le hawikom phu hna nih July 3 in an rak thawk i tuzing ah a laak khawh. Kahdohnak kongkau le hriamnam kuanzen laak mi zat tu cu an thanh rih lo.
Tuluk nih kahnak ngol ding in a hneek hna liopi ah khuapi an laak khawh hi a si.
Tutan i Lashio khuapi hrambunh North Eastern Command an laak mi hi Tlangcung hriamtlai hna nih a voi khatnak bik SAC Regional Command hmumpi an laak khawh mi a si tiah kan theih.
