CDF-Hakha nih “Operation Rung” min in SAC ralkap dohnak pehtlai in a tuah i July 16 in July 28 tiang, ni 5 chung ah SAC ralkap pahnih an tlaih hna i a dang 13 an thah khawh hna, tiah CDF-Hakha nih thawngthanhnak a tuah.
July 16 ah Timit ah a ummi SAC ralkap pahnih cu CDF – Hakha nih an tlaih hna. July 23 ah Hakha University in motor pahnih in a rak kaimi SAC ralkap pawl cu CDF-Hakha nih an kah hna i ralkap pahnih an thih pin ah hliamtuar an tampi.
July 24 zong ah Auto Tlang lei ah thazaang chap ding in a kalmi SAC ralkap pawl cu CDF-Hakha nih lampi ah an kah hna i ralkap paruk an thi. Landmine zong an i lamh fawn.
July 25 zaan ah Pengkomh meithat zung i hmun a khuarmi ralhrang pawl cu CDF-Hakha nih an kah hna nain a thimi le aa hliammi an um le um lo theih a si lo.
July 28 zaan zong ah Thantlang lei ah thazaang chap ding in a kalmi ralhrang mawtaw cu CDF-Hakha nih bomb an puah hnawh i SAC ralkap panga an thi, hliamhma faak a pumi zong an tampi, tiah CDF-Hakha nih a langhter.
“Kan ram le miphun luatnak caah fek chinchin ṭangrual hna u sih. Teinak ni a nai cang caah kan si khawhnak lam cio in ram le miphun ca ah thazaang chuah ding in kan in sawm hna,” tiah CDF-Hakha nih forhfialnak le sawmnak zong an tuah.
