February 1 in 11 tiang chung ah CNA, CDF komh le SAC ralhraang kar kahdohnak Chin ram hmun tampi ah a chuak i ralhraang lei in 40 leeg an thi, Chin ralkap CNA lei in pathum nunnak a liam i pahnih hma an pu tiah CNF nih a thanh.
CNA Brigade -1 hmun a si mi Matupi le Rezua kar, Zotung ram chung ah February 4 thawk in Council ralhraang 150 hrawng le CNA, CDF-Matupi, CDF-Zotung, CDF-Mara komh ralkap hna karlak ah ni ruk chung kahdohnak a chuak i SAC ralhraang 40 nak tlawn lo an thi, 20 leng hma an pu tiah an langhter.
CNA Brigade-3 hmun chung a si mi Thantlang khua chung zong ah Council ralhraang paruk cu a nung in an tlaih hna leng ah Ralhraang pawl umnak Palek Sakhan le Uknak Zung zong CNA le CDF-Thantlang nih an lak khawh.
Riahcaw a phor mi CNA le CDF-Hualngoram ralkap pawl cu February 4 , CNA Brigade-4 hmun chung um Laitui khua pawng ah Ralhraang Council hnuzul Zomi Revolutionary Army (ZRA) nih an rak bawh hna caah kahdohnak a chuak. Cu kahdohnak ah cun Ralhraang hnuzul ZRA in pakhat a thi i pahnih hma an pu.
A cunglei langhter mi kahdohnak pawl ah cun Council ralhraang le a hnuzul ralhraang 45 nak tlawm lo an thi i hriamnam zun 50 leng kan lak khawh tiah an langhter.Hi chung ah CNA ralkap pathum nih ram le miphun caah an nunnak an pek ve.
February 1 in 12 tiang Thantlang peng chung ah Ralhraang Council nih vanlawng in kahdohnak a tlawm bik ah voi 10 a tuah leng ah Hakha Rungtlang ralkap umnak in Thantlang lei ah hriamnam ngan zong a kah lengmang tiah an thanh.
Photo: Thantlang Palek Sakhan laak kahdohnak ah Chin ralkap hna laak mi ralhraang hriamnam pawl
