Karenni ramkulh, Demoso peng um Ngwaytaung hrambunh Kah Mah Yah – 102 Battalion chung um hriamnam chiahnak inn pakhat a kangh lio ah KNDF le tangti phukomh nih an kah hna ca ah puahkeh thawng pehtlai in a thang tiah KNDF nih thawng a thanh.
Cu hriamnam chiahnak inn cun zaanlei suimilaam 1:30 hrawng ah puahkeh thawng a thang i kangh hram aa thawk. Ralhraang pawl nih mei an phalh lio ah KNDF le tangti phukomh nih hriamngan in an kah chih hna ca ah mui lai tiang mei a kaang rih tiah theih a si.
“A kaang mi hriamnam chiahnak inn hna in pehtlai in puahkeh thawng an thang i zaanlei tiang ah mei kangh a dai rih lo. Cu 102 battalion chung in cun an au, an i hro len thawng kan theih” tiah KNDF nih thanh mi ah an tialchih.
Cu hrimnam chiahnak cu khuate lei pawl a kap kho mi hriamnam chiahnak hmun pipa pakhat a si i, Demoso peng chung Council ralhraang le KNDF, KA, PDF tangti phukomh he kahdohnak ah ralhraang lei nih hriamngan in voitam pi an kah hna tiah kan theih.
Demoso peng chung ah kap hnih kar kahdohnak a fak chin lengmang. Ralhraang lei nih hriamngan in an kah lengmang hna caah kahdohnak he aa naih deuh mi khua hna cu himnak hmun ah i thial ding in KNDF nih thawngthanhnak a tuah.
