Falam khua ah ngakchia carel an zuam khawh nakhnga tiin Ni Nu Caruk (Library) rianngeitu upa hna nih tangka phalh in ngakchia ca an relter hna, tiah kan theih.
Hi kong he pehtlai in Ni Nu Caruk (Library) rian ngei upa Mai Merry Kip Nem Sung nih, “Atu kan caruk ah kanmah nih a ri kan khiah mi ahcun taang 10 tang pawl ca ah a si. Cahmai 50 tang a rel kho mi poh Ks. 200, cahmai 50-100 a rel kho mi poh Ks. 300, cahmai 100 cung a rel kho mi poh Ks. 500 kan pek hna lai. Hi bantuk in kan tuahnak a ruang bik cu Lai miphun kan dihlak carel zuam deuh usih ti kan duh. Laimi hi kan ngakchiat lio tein carel a zuam mi kan tlawm tuk ca ah carel hi kan zuam lo ti ning law ka palh theng lai lo dah. Carel kan zuam nakhnga tiin kan ngakchiat lio tein carel hi cawng hna usih ti saduhthahnak he kan tuah mi a si,” tiah The Hakha Post ah a chim.
Ni Nu Caruk hi Nu Len Nei Cer tawlrelnak in an thok mi a si i, caruk chung ah cauk uk 800 leng an chiah cang. Cun, atu bantuk in tangka bawmhnak hi Rome ram ah a um mi Pi Pansy Dwe nih bawmhnak a pek hna.
photo/Ni Nu Library Facebook Page
