Myanmar rampi huap kahdaih hnatlaknak (NCA) ah aa tel mi Mon hriamtlai New Mon State Party (NMSP) cu bu hnih ah an i ṭhen i a thar a chuak mi nih SAC ralkap kan doh ve cang lai, tiah nihin February 14 ah cathanh an chuah.
SAC ralkap doh ding in a thar a chuak mi bu hi New Mon State Party (Anti-Military Dictatorship) tiah min an bunh i a tawinak in NMSP-AD tiah an auh.
MNLP ah General Scretary a si mi Naing Zay Ya, Naing Bangyia Law le Naing Yi Yi Kaung hi SAC ralkap doh a timtu NMSP-AD ah an i tel.
Cun, MNLP tang ah a um mi hriamtlai bu Mon National Liberation Army (MNLA) i Deputy Chief of Staff a si mi Brigadier General Salon Htaw zong MNSP-AD ah aa tel ve.
MNSP-AD nih, “SAC nih uknak a laak hnu in SAC ralkap he voi 3 tiang tonnak kan ngei i, Myanmar ram buainak hi party kip, hriamtlai kip le miphun kip ton biaruahnak in chimphoih a herh tiah kan chim lengmang nain kan chim bantuk in thil a kal kho bal lo. Hriamnam i bochan in SAC ralkap nih nitin in rammi cung ah tuksum sualnak a tuah lengmang pin ah Mon ramchung zong ah tlaihkhih, mithah, innkhangh, hriampi in kah le vanlawng in kah tibantuk a tuah lengmang caah SAC he ton biaruahnak ngeih cu a si kho ti lo,” tiah cathanh ah an langhter.
“Cucaah, Myanmar ramchung miphun kip nih tlukruannak le mahte lairelnak nawl a ngei mi Federal Democracy ramkomh dirh ding in tlangcungmi hriamtlai bu hna le Pau Dohthlennak ah aa tel mi bu hna he ṭang ṭi in SAC ralkap kan doh cang lai,” tiah MNSP-AD nih cathanh a chuah.
MNSP-AD nih SAC ralkap doh ding in cathanh a chuah mi kong he pehtlai in atulio SAC ralkap a do cuahmah mi Mon Liberation Army nih, “Lunglawm te kan in don hna. MNSP-AD he ṭang ṭi in SAC ralkap kan do lai,” tiah cathanh an chuah ve.
Atu kum January 26 zong ah khan NCA ah aa tel mi Pa-O miphun hriamtlai Pa-O National Liberation Army (PNLA) nih NCA in kan chuak tiah an thanh i, SAC ralkap kut tang ah a um mi Hsi Hseng khua zong an laak.
