Shan ramkulh Thlanglei, Hsihseng khuapi ah a um mi LIB-424 SAC ralkap battalion cu NCA min a rak thu mi Pa-O National Liberation Army nih nizan January 26 ah an kah i an laak tiah nihin ah an thanh.
PLAO/PNLA cu NCA min a thu mi phu an rak si i SAC tuah mi daihnak kong ceihmainak zong ah a kai lengmang mi an rak si.
“Ralkap nawlngeihnak a dongh i rammi zapi nih duh mi federal democracy ukphung a chuah tiang sining aa khat mi unau hna he hmun khat ah kan doh lai,” tiah PNO/PNLA nih January 26 ah thanhnak a rak tuah.
LIB-424 SAC ralkap battalion laak kahdohnak ah cun PNLA nih hriamnam tampi zong an laak khawh i, Hsihseng khuapi zong an kut cung ah a um cang tiah theih a si.
SAC hnuzul PNO Pyithusit 150 hrawng nih Hsihseng peng, Lwehtwe khuate ah a rak kan fuh caah kan dawi than hna ti zong PNLA nih cathanh ah an langhter.
Pyithusit pawl nih ralkap nawlngeihnak bawmchantu si lo in miphun luatnak lei tu ah i mer ding zong PNLO/PNLA nih forhfialnak a tuah.
