Shan ramkulh, Naungcho khua pawng ah a ummi Thanbo SAC ralkap sakhaan cu PDF-Mandalay le TNLA nih nizan January 3 zinglei ah an lak i SAC ralbawi Lieutenant Colonal Thet Aung an tlaih, tiah Khit Thit Media nih a ṭial.
“Taungthamaan Operation” timi minbunh in TNLA le PDF-Mandalay nih January 2 thawk khan Thanbo SAC ralkap sakhaan cu an doh i, January 3, zinglei sml. 7:30 ah tlamtling tein an lak khawh.
Thanbo SAC ralkap sakhaan an lak dih hnu, chunhnu sml. 2:25 ah SAC nih Kyaukme khua in bawmtu ralkap pawl cu motor pathum khat in a rak thlah hna.
Bawmtu ah an thlahmi hna SAC ralkap pawl cu lam tanṭim ah TNLA le PDF-Mandalay nih an kah ṭhan hna i SAC ralkap tampi an thih pin ah hriamnam tampi an lak chap.
Thanbo SAC ralkap sakhaan ah ralbawi a simi Lieutenant Colonal Thet Aung hi PDF-Mandalay le TNLA nih a nung in an tlaih i, hriamnam zong tam ngai an lak.
Hi Thanbo SAC ralkap sakhaan laknak ah hin PDF-Mandalay in a nunnak a liammi ralkap an um ve, tiah PDF-Mandalay nih an langhter.
