Ralkap nih nawlngeihnak chuh hnu 2021 February 1 in 2024 November 25 tiang ah SAC ralkap le an hnuzul pawl kut in rammi 5,982 an thi cang tiah Ramkheel Thongtla Bawmchantu Bu (Assistance Association for Political Prisoners – AAPP) November 25 report nih a langhter.
SAC kut in a thi mi rammi hna chung in minung 673 cu ngakchia an si i, 1,286 cu nu an si.
Nawlngeihnak chuhnak he pehtlai in tlaihkhih a tong mi 27,715 an si cang i, cu chung ah minung 21,158 cu hren lio mi an si. Hren lio mi hna chung in 9,539 cu thongthlak hremnak pek an si tiah theih a si.
SAC nih a tlaih mi hna chung ah 577 cu kum tling lo ngakchia an si i, 5751 cu nu an si.
A cunglei langhter mi hna cu AAPP nih a hlat khawh tawk cazin lawng a si i a taktak ah cun hi nakin an tam deuh kho ti zong report ah an langhterchih.
SAC nih rammi hna cung ah tinh ciammam in kahdohnak a tuah i November 18 ah Shan ramkulh, Phekon peng ah a um mi Bankoh ralzaam camp cu vanglawng in bomb a thlak than. Cucu a voi hnihnak bomb a thlaknak a si i Khrihfa Biakinn le inn 10 leng a rawh pin ah a thi mi le hmapu zong an um tiah theih a si.
Kan hnu zarh chung ah Sagaing ramthen, Kyunhla peng khuate pawl ah SAC ralkap le a hnuzul hna nih inn 500 hrawng an khangh. Ni fatin ti awk in rammi an tlaih hna tiah AAPP report ah an langhter.
