Zapi aw
Nawi Dam kong ah lo ngeitu authawng
Atulio kan upate nih Nawl tidil kan ser lai, tiah an timhtuah mi hi a biapi cu dinti ah kan ser lai an ti. Nawi tihna a ngei lo mi, lutiluang, Hakha hmunthur vialte, vok ek, zunput, minung hman mi a thurhnawm vialte, a rak luang mi, minung nih din ngam ding a si hnga maw?
2009 kum lio ah Pu Ni Kung nih a rak zoh lio ah hin Hakha a rak cim rih lo. 2015 kum ah Rungtlang tang um mi Ralkap tili, Nawisuah, Zareibual, Liansa tili, Baar tili le Siangpa tili, ngakhur pawl vialte ruang ah kan Hakha khuapi cu a cim dih. Mah ca ahcun mah vialte tidil cu chilhter dih mi an si.
Atu ah a thar in Nawi dil an timh than. A ngan mi le a kau mi rili an dil hnik cang. Hakha vawlei a dor, an ti ca ah College Sianginn, Lungrang tlang (Kohtikun), EPC, CCU tiang le Gangaw lamthlang vialte, a hnuh khawh dih mi a si. Hakha khua rawhnak khua an khaan bia a si lai. Hakha khua laifang ah rilipi um cu, tih a nung tuk mi a si. Rilipi a um ahcun minung ca ah tihnung tuk mi a si lai.
Nawi leikuang a ngeimi hna ca ahcun Nawi cu kan pawcawmnak a si. Facang lawng si loin, minung cin mi vialte, satil le nga kan zuatnak hmunhma a si. Zungzal kan khuasaknak le kan innlo rili nih chilh lai kan siang lo. Cun, Timit dinti a rat khawhlonak a ruang a um, an ti. A rat khawhlonak kong tu cu an chim ngam lo. Ti an than chom mi kha Timit ti a ra tiin Viewpoint honnak an tuah lio ah Bawi vialte nih an kut an bengh dih an ti. A hmu mi le a thei mi nan rak um cio ko lai. Pu Ni Kung nih lo ngei mi pa pakhat cu rian a rak fial i nihlawh tling tein a pe dih lo. Ruat hmanh! Nawi tidil in Timit lo a ngei mi ti kan pek lai, an ti hoi. Thancho an duh ko mi cu kan i lawm. Asinain buaktlakte le ruang tein riantuan ah a tha. A hramthok in lo ngeimi hnatlaknak pakhat hmanh a um lo. Pathian kutneh cu a rawk kho bal lo. Minung serchom mi cu a rawk kho. Kan fing le kan tlang, kan neelrawn le kan tiva aa dawh tuk mi lohtlau lai kan siang lo. Tangka zeizat hmanh in kan siang lo. Hakha a daw mi vialte nih, mah tidil hi cu kan doh awk a si ko.
Lo ngeitu ai-awh in,
Pu Kep Luai, Pu Ro Cung, Daw Par Hoi Dim, Pu Thang Hlun le Pi Sung Thai
Biakilh: “Zapi aw le hmuhning” hna hi The Hakha Post dirhmun an si lo. Catialtu he direct aa pehtlai mi an si.
