Shan ramkulh Chaklei, Naungcho khuapi chung kahdohnak cu nizan in nihin June 26 zinglei tiang faak ngai in aa peh i, chun sml. 12:00 hlan ah khuami hna nih khua chuah taak ding in TNLA le PDF phu komh nih ralrin peknak an thanh tiah ramchung media nih an ṭial.
Khuapi chung hmun biapi dihlak ti awk in Ta’ang hriamtlai TNLA le ṭangṭi phu nih an laak khawh i, SAC ralkap sakhan umnak pawngkam ah kahdohnak a faak ngai tiah tualchung mi nih an chim.
SAC lei nih June 26 zinglei thawk in Naungcho tlanglawng station le khuachung ah miakpi pehtlai in an kah. Cucaah TNLA le PDF phu komh nih khuami hna cu khua chuah taak ding in ralrin an pek hna tiah Shan News nih cun a langhter.
SAC ralkap nih khua chung ah miakpi pehtlai in an kah ruang ah khuami a thi mi le inn a rawk mi zong an um tiah theih a si.
SAC nih vanlawng in kahdohnak a tuah lai ti an phan ruang ah khuami tam deuh cu kiangkap khua ah an zaam i, khua chung a him deuhnak hmun le mahle inn ah aa dor rih mi zong an um, tiah theih a si.
TNLA nih an chuah mi cathanh ah cun, Shan ramkulh Chaklei Kyaukme, Moekok, Naungcho le Tibaw peng ah a cang mi kahdohnak hna cu Operation 1027 a peh a si tiah an langhter.
Naungcho cu Mandalay le SAC ralbawi sianginn umnak Pyin Oo Lwin he aa naih bik mi khuapi a si i, Mandalay ramṭhen le Shan ramkulh ramri ah a um mi khua a si.
