■ Ni li chung kahdohnak ah SAC hriamnam zun 500 leng an laak cang
Shan ramkulh Chaklei, Naungcho (Naung Hkio) khuapi hrambunh Kha Mah Yah – 115 SAC ralkap sakhan laak kahdohnak ah hriamnam 380 leng kan laak khawh tiah Ta’ang hriamtlai TNLA nih June 28 ah a thanh.
Cu SAC ralkap sakhan cu TNLA le Mandalay PDF phu komh nih an laak mi a si i “Operation 1027” a peh kahdohnak a si tiah kan theih.
Kahdohnak ah MA-1 zun 24, Ma-2 zun 13, MA-3 zun 36, MA-4 zun 4, M22 zun 1, G3 zun 10, Rifle zun 103 le Carbine meithal zun 159 tin in meithal zun 349 an laak mi cu hmanthlak he an langhter.
Hriamnam ngan ah: Machine gun a hme zun 11, Ma-15 machine gun zun 1, Point 5 meithal zun 1, M79 zun 1, 81 MM mortar zun 1, 81 MM launcher zun 2, RPG-7 zun 4, 60 MM zun 2, 60 MM peng a hme mi zun 10 kan laak khawh tiah an ti.
Cun zenthong thong 50 leng; RPG, 60/80 mm bomb thei 500 leng, mine le i chawnhnak seh zong an laak hna.
Cu leng ah, June 26 i Naungcho khua, Kantkaw SAC ralkap sakhan le a dang sakhan pawl in hriamnam zun 50 leng an laak. Hriamnam chiah in a rak i ap mi SAC ralkap 17 he hriamnam zun 50 leng an laaknak kong zong TNLA nih a langhter.
Ni 4 chung kahdohnak ah TNLA le ṭangṭi ralkap hna nih SAC hriamnam phuntling zun 500 leng an laak khawh tiah theih a si.
Photo: TNLA (Naungcho Kha Mah Yah 115 ah an laak mi SAC hriamnam an si.)
