Shanram chaklei Kutkai peng, Namhphatka kahdohnak ah Kachin hriamtlai KIA nih SAC ralkap meithal phunphun zun 300 hrawng an laak, tiah theih a si.
Namhphatka ah a um mi SAC ralkap (Kha La Ya-123) sakhaan le hriampi kahnak sakhaan cu KIA nih December 2023 in khan doh hram an thawk i, atu thla January 24 ah tlamtling te in an laak khawh.
SAC ralkap sakhaan an laaknak ah cun Howitzer hriampi pahnih, vanlawng kahnak pakhat le meithal phunphun zun 300 hrawng an lak hi a si.
Namhphatka SAC ralkap sakhaan dohnak ah hin KIA in ralkap 28 an nunnak a liam i, a dang 53 nih hliamhma an pu, tiah KIA ralbawi pakhat nih 7 Stars News sin ah a chim.
Namhphatka kahdohnak ah hin SAC ralkap Fighter Jet (FTC-20000 G) pakhat KIA nih tla lak in an kah i, vanlawng a rawk mi hmanthlak pawl zong an langhter.
