Magwe ramṭhen, Myiang peng chung kahdohnak ah SAC ralkap 12 an thi i, a dang ralkap panga cu PDF nih an nung in an tlaih hna, tiah theih a si.
Myaing peng chung i khuate pawl mei a khaangtu le thilri a firtu SAC ralkap pawl cu nizaan August 21 zinglei ah Myaing-PDF hruainak in dohthlengtu ralkap bu 10 leng nih lampi ah an kah hna.
Myaing-PDF ralkap pakhat nih, “Hi SAC ralkap bu hi kan hnu thla ah khan hika lei ah hin an rak phan i, aluancia ni thum ah khan Htan-nge timi khua mei in an khangh. Cun, kiangkap khua ah an lut i facang, chiti le thilri pawl an fir. Nizaan zinglei ah khan thazaang 40 hrawng in Kaing-taw-mah khuate pawng ah an rak ra i, kan kah hna,” tiah a chim.
Kap hnih kahdohnak suimilam pasarih hrawng a rau i SAC ralkap 12 an ruak in an char hna pin ah a dang panga zong an nung in an tlaih chap hna.
SAC ralkap meithal zun 19, RPG rocket bomb le kutcheh bomb pawl tel in zenkuan tampi zong PDF nih an laak, tiah theih a si.
