Rakhine ramkulh, Myaypone peng, Kanthar Htutwa sang Nah Tah Lah Zung cu nihin, September 7 zing suimilaam 11:00 hrawng ah AA nih bomb an puah ca ah ralhraang 15 hrawng an thi i, cu puahkehnak ruang ah Myaypone – Minpya motor lam an phih tiah tualchung mi nih an chim.
“Council ralhraang pawl hi Nah Tah Lah Zung ahhin an ra lengmang. Nihin a ra mi cu an tam ngai, 40 hrawng cu an si lai. Cuka Nah Tah Lah Zung ah cun an um. Zung chung in puahkeh thawng voi li nga hrawng a thang. A rau lo, tlawmpal ah mithi ruak pawl an i put hna i an kal dih. Ruahdamhnak ah 15 nak tlawm lo cu an thi lai. Meithal zong an puah pah len,” tiah tualchung mi pakhat nih a chim.
Bomb puah thawng hi voi 4 a thang nain ralhraang lei thi le hliamtuar bel kan thei kho rih lo tiah Myaypone peng Pyithu Hluttaw Palai thing U Phe Than nih a chim.
“Nah Tah Lah Zung chung in puahkeh thawng kan theih tiah zung pawng um mi nih phone in an ka chimh. Khi zung ah khin council ralhraang pawl an ra i an i thum lengmang. Zarh khat hrawng an um hnu in Myaypone khua in meng 3 hrawng a hla mi Kanthar lei ah an kal. Kanthar lei ah zarh khat hrawng an va um hnu ah ka lei ahhin an rak kir than. Mah ti in an umkal lengmangnak hi a sau pah cang. Kan theih khawhnak vial ah cun ralhraang pawl an um lo kar ah AA lei nih bomb an rak hmanh phun a si. Council ralhraang 40 tluk cu Kanthar lei in an rak phan i zung chung an luh ah puahkehnak a chuah hi a si tiah an chim,” ti in a chim.
Council ralhraang pawl nih a thi mi le hliam a tuar mi hna cu Minpya ralkap sii-inn ah an chiah hna i Minpya zong ah a hlan nakin runvennak lei an chap deuh tiah tualchung mi nih an chim. Ref: Khit Thit Media
