Karen ramkulh, Myawaddy peng, Latkhat tlang lei ah raallamsial in a ra mi SAC ralkap pawl kan kah hna i major pakhat le captain tel in SAC ralkap 15 an thi, hriamnam tampi kan laak tiah Cobra Column nih nihin ah an thanh.
Nizan August 15, zinglei 3:00 hrawng ah Myawaddy in Latkhat tlang lei ah SAC ralkap nih miakpi pehtlai in an kah pin ah vanlawng nih kah a bawmh hna i ke ralkap nih an rak kan nam. Cobra Column le ttangtti phu nih kan doh hna i SAC lei ah major rank pakhat le captain rank pakhat tel in ralkap 15 an thi, 21 hma an pu tiah an langhter.
Cu kahdohnak ah cun SAC ralhraang nih miakpi zun 300 leng an kah, vanlawng in voi thum bomb an thlak i Mi-35 helicopter nih voi thum kah a rak bawmh hna tiah Cobra Column nih an thanh.
Kahdohnak ah SAC hriamnam a si mi 60 MM hriam ngan zun 1, MA4 zun 2, MA3 zun 3, MA sniper zun 1, MA2 zun 4, MA1 zun 1, M16 zun 1, kuan bawm 60, 60 MM bomb thei 36, RPG bomb thei 9, 40 MM bomb thei 57, machine gun a peng 2, pehtlaihnak seh, zenthong 7850 le a dang kuanzen pawl an laak khawh.
SAC Ralhraang pawl nih hriamnam ngan tam tuk an kah caah pehtlaihnak tower tung le biaknak inn pawl an rawk i rammi ralkap pahnih nih ram caah an nunnak an pek, panga hma an pu tiah Cobra Column nih an thanh.
Video: Cobra Column -4
