Karen ramkulh, Myawaddy lei ah bawmh ding in a kal mi SAC ralkap Tank (Armoured vehicle) le Machine Gun an tarh mi motor pawl cu Daw-Nah tlang hram ah Karen hriamtlai KNLA le PDF nih nizaan April 21 ah an hrawhpiak khawh hna, tiah theih a si.
Thailand-Myanmar ramri Myawaddy khua i a donghnak bik SAC ralkap sakhaan (Kha La Ya 275) cu Karen hriamtlai nih an rak laak i Kha La Ya 275 ah a um mi SAC ralkap pawl cu Thailand-Myanmar ramri hlei pawng ah an zaam hna.
Nizaan ah an hrawh mi SAC tank le motor pawl hi ramri hlei ah a um mi SAC ralkap pawl bawmh ding in a kal mi an si, tiah an chim.
Bawmh ding in a kal mi SAC ralkap pawl cu Daw-Nah tlang hram ah KNLA le PDF nih an kah hna i SAC raldohnak tank pakhat le Machin Gun an tarh chih mi motor paruk an hrawhpiak khawh hna, tiah theih a si.
