Chawlehthalnak le ramri pehtlaihnak ca ah abiapi tuk mi Thailand-Myanmar ramri, Karen ramkulh chung i Myawaddy khua cu KNU/KNLA nih a laak khawh cang, tiah theih a si.
“Myawaddy khua ah a donghnak bik a taang mi SAC ralkap sakhaan Kha La Ya (275) cu kan laak khawh cang i Myawaddy khua zong tlamtling in laak a si cang,” tiah KNU/KNLA nih nihin April 11 zinglei ah theihternak a tuah.
Kha La Ya (275) ah a um mi SAC ralkap pawl cu hriam chiah ding in KNLA nih an fial hna nain an duh lo caah April 8 thawk in KNLA le KNDO nih doh hram an thawk i nihin zinglei sml.4:20 ah an laak khawh hi a si.
Kha La Ya (275) ah a um mi SAC ralkap 200 hrawng cu Thailand ah zaam ding in ramri hlei ah an i pong hna i, Thailand lei nawlngeitu hna nih luhnak nawl an pe rih hna lo, tiah theih a si.
Photo: KNU
