Daw Tint Tint Lwin nih Thantlang khuataw Lahva lei kalnak ah acre 11 a kau mi hmun ah tangka sing 10,000 hrawng dih ding in Thantlang Hill Resort a sak cuahmah, Myanmar ram ah Lung in sak mi Hotel hmasa bik a si, tiah kan theih.
Hi Thantlang Hill Resort (Hrimhthannak hmun asiloah Hotel phunkhat) hi acre 11 a kau mi a si. Nihin tiang ah sing 10,000 hrawng dih ding in an sak cuahmah. Hawikom rual he siseh, chungkhar le honeymoon khualtlawn a duh mi hna nih riah le tlun khawh a si. Inn fa tete hi inn 21 an sak cang i riahnak siseh, mahte rawlchuannak tibantuk zong a umchih. Chin nunphung thilri tete zong a chiah hna. Atu hi a tlangpi in a lim cang i Kum 72nak Chin Miphun Ni hlan ah lim dih a timh, tiah kan theih.
“Kei hi ka ngakchiat tein Switzerland ram ah ka phan i khika ram hrawng ah ka thanglian. Khika ram Switzerland le Germany ram hrawng khi Chinram bantuk in tlang lawngte a si. Cucu, Thantlang zong ah hin tuah duhnak thinlung ka ngei i ka tuah mi a si. A ngaingai cu Chinram hi ramdang nakin aa dawh deuh. Atu hi kan lim deuh rih lo nain ramchung ramleng in khualtlung an um pah cang. Chin Miphun Ni ca hoi cu Pyidaungsu Cozah nih a dihlak in an kan booking cang. Hihi lunghmuih ngai in kan tuan kho rih lo i a lim zong kan lim rih lo. Myanmar ram ah lung in sak mi Hotel hmasa bik a si lai ka zumh,” tiah Daw Tint Tint Lwin nih The Hakha Post ah a chim.
Daw Tint Tint Lwin hi Tint Tint Myanmar Group of Companies ah President a tuan lio mi a si. Amah hi Shan Ramkulh, Sagaing Ramthen, Mandalay Ramthen le hmun dangdang zong ah Hotel tampi a ngei mi a si. Amah hi Chin United FC President a tuan lio mi zong a si, tiah kan theih.
